بتخرج !

بسم الله الرحمن الرحيم

اول شي

ان شاء الله يكون متوفق بالامتحانات ولحد الآن الامور طيبة عند الجميع

ثاني شي

الصورة الى فوق اتوقع معبرة جدا عن حالتنا الكسيفة والكسيحة والي كل مصطلحات المآسي ماتوفي بحقنا يعني زين ما نكتب على هدومنا نبي نتخرج !!

-----------

ثالث شي

سمعوا هالاغنية عن الكلية

http://www.4shared.com/file/47386205/f076f453/sabreen.html

وقصة الاغنية موجودة بآخر الموضوع0000000

--------------

بالنسبة للمواقف والأحداث خل اقولكم الموقف الى صار بالمدني

طبعا المادة احنا كنا مخطرين فيها سطر

ومو حطين لها اهتمام

ويمكن كنا نداوم اصول فقة اكثر ما نداوم المدني الى شفنا فيه الدكتور جمن مره عن الحسافة

بس نطمش نشوف شسالفة من شهر لي شهر

طبعا الحالة بالايام الى طافت اللهم ياكافي

لما تدرس حق فاينل والكتاب الأخضر يللللق الى جنه تيشيرت واحد من الشباب

وانت ماكنت اداوم

فمخك اشوي راح يتعب وياك

لدرجة انه قبل الامتحان

نسولف مع بعض جذي

تعال يا فلان لا ارهنك رهن حيازي

واهو يرد لك يقولك ترا انا لي رهن رسمي على بيتكم دير بالك لا ابيعك بالمزاد العلني

طبعا بالامتحان امس

الامتحان من الوهلة الاولى(حلوة الوهلة الأولى اعجبتني بصراحة) لول

تشوفه سهل وبسيط بس فيه تركات ولوعة جبد وتقعد تفصل

وتحط فرضيات واذا واذا واذا واذا

شائت الصدف إني اقعد اول واحد

وانا قاعد احل وحدي مندمج لأني كنت قاعد أألف قانون مدني يديد حق دولتنا العزيزة

اشوف دكتور جدامي يفتر صوب القسم الى يسون فيه الاكل بالكافتيريا

ويطل بالثلاجات ومادري شقاعد يتعبث ذاك الصوب

انا ما اهتميت لاني مشغول بالبلوة الى عندي

شوي ولا الحبيب مادري شمسوي ويطفي الليتات ويرد يشغلها

طبعا الموقف لما تعيشة إتنرفز

انت بنص امتحان ويطفي الليت وين قاعدين

بالمخيم ولا الشالية

----------------------------------------------

طبعا بعد الامتحان

النظريات انتشرت بين الشباب

والتأليف كان فوق المعدل المعتاد

ما انقول الا الله يستر

الى يقول شكلي باخذ الرأفة كلها حق المدني

والي يقول انا راضي بالستين بس بفتك

والى منصدم من الامتحان

انا اقول

لا ندقق وايد ولا نفكر وايد لانه بصراحة مابقى بعقولنا شي من هالكلية

ينينا وقعدنا والى يعتقد انه لما نتخرج راح يعطونا الروب الازرق وفيه شريطة صفرا غلطان

ترا روب مستشفى الميانين ناطرنا من الحين

لول

والمستشفى مو بعيد الدوار الى ورا الجامعة

راح نلبس الروب الأبيض لا بالمقلوب بعد ونروح حفل التخرج

-------

----

نقطة مهمة جدا

ياجماعة احنا مو قصدنا نتشمت بأحد

لانه مو قاعد نذكر اسامي اشخاص محددين بالعكس يعني الى نكتبه عن حالنا يعني مثل ما يقولون شر البلية ما يضحك

ومن الردود ما شاء الله قريحة الطلبة انفتحت والكل بدا يشكي

اهم شي قريحة كل واحد يدر باله على قريحته

-------

---------

دفعة 2004 حالها حال الدفع الباجية يعني مرينا بنفس الى قاعدين يمرون فيه ويمكن اكثر

وبصراحة مشكورين وايد على الردود الحلوة

ندري راح تفقدونا بس ترا لاتحاولون ماراح نقعد بالكلية بنتخرج ان شاء الله

------

---------

بالنسبة للمواد الصعبة

في مادة صج صعبة وتبي مجابل

وفي دكاترة يحليلهم يسويها مادة غصب

يعني المادة مافيها شي وقبل سنتين الكل يطلع فيها بدرجات عالية

ايلك دكتور (وبدون ذكر اسامي علشان لاتقولون احنا قاعد نتشمت بس نتكلم عن واقع وشي موجود)

عايش الدور وحاله حال ابراهيم الصلال ببساط الفقر

شوفوا المشهد

http://www.youtube.com/watch?v=QJD5CYbg5_g

عباله اهوا الى الدنيا كلها تبيه ومحد احسن منه بالشرح

وانه يفهم عدل والمشرع السويسري استعان بخبرته القانونية ومطلوب حق الدستور الياباني

والطلبة يموتون فيه والبنات يغشون لما يمر

واهوا مسكين مايدري انه الكل يبي الفكة منه

بس شنسوي حكم القوي على الضعيف

-------

---------

المشكلة بالجامعة محد فوق الدكتور الا الله سبحانه وتعالى

والى مايخاف من الله ماراح يحط اعتبار حق احد

بس اذا اهوا ظلم احد بالدنيا وين بيروح بالآخرة اذا ماكان يراعي ضميرة

وانا اقول حق الى ينظلمون من الدكاترة حقكم راد لكم راد لكم

وفكروا فيها

اول شي انت سو الى عليك واشرح للدكتور وبين له انه ظالمك

وااذا ما رضى

اذا ما حاشته حوبتك بالدنيا

مصيرة بالاخرة بيرجع لك وبتاخذ من حسناته

-----

----

الموديل اليديد

للدراسة

تدرس والأيبود معاك

والنوت بإيدك

وماجد المهندس يغني ويقولك

بين إيديا واحس انك غريب

وانت اتقول الى والله يا النوت بين ايديا واحس انك غريب

وانتا مبلم بالنوت او واقف بصفحة غلجة مو راضي اطوفها

-----

----

باقي 28 يوم على نهاية الامتحانات ان شاء الله

راح الكثير وبقي القليل بإذن الله

وان شاء الله راح نتذكر هالايام ونضحك عليها

------

----

نصيحة بعد خبرة طويلة

هالكلية مو مال الواحد يعطيها ويه وايد

خوش نصيحة لول

يعني بإختصار جابل دراستك وسو الى عليك وتوكل على الله وارضا بقضاء الله وقدره

وفي شغلة مهمه في ناس وااااااااايد يقصون على روحهم ويقولون هذا نصيبنا او الله كتب جذي

واهوا ما يكون باذل الاسباب اصلا وهذا يسمونه تواكل مو توكل على الله

مو كل ما صار شي قلت الله كاتب جذي

لازم الواحد اول شي يبذل الاسباب وبعدين يرضا بالنتيجة

مو يقص على روحة من البداية ويقول هذا قضاء الله وقدره

واهوه حاط ريل على ريل

لانه بعد فترة راح يتحسف وايد لانه مابذل الاسباب ويدري انه غلطان

فتوكلوا على الله وما كو الا العافية ان شاء الله

صج انه هالكلية تعبنا منها وايد

بس والله استانسنا فيها وايد

وكل مكان فيه الزين والشين

صج انه في ناس استغفر الله حتى بالجنة ودك ماتشوفهم وياك

بس سدد وقارب

وان شاء الله جم سنة وتكون متخرج ومفتك

----

------

على طاري التخرج

في اغنية تراثية اسمها من راس السالمية لي راس بنيد القار

هذا اغنية الموسم لانه الفيديو كليب خيااااااااااااااااااااالي

لول اتوقع عقب التخرج هذا حالنا ندور وظيفة مثل صاحبنا الى بالفيديو كليب يدور السمج

شوفوا والحكم لكم

http://www.youtube.com/watch?v=r1nSR4Om2eM

-------

------

استفتاء الموضوع

شنو اكثر مادة خايف منها وليش ؟!

بإنتظار اجاباتكم

سواء بالرد على الموضوع

او على الايميل التالي

q8law2004@hotmail.com

بإنتظار قصصكم على الايميل علشان ننشرها لكم علشان لاتضيع بين التعليقات ارسلوها على الايميل

------

----

قصة الاغنية الى اول شي

اذا ماني غلطان هذيل طلبة ضباط من كلية سعد العبدالله العسكرية لما تخرجوا سوا سمرة يعني (حفلة) حق الطلبة الذربين الى عندنا بالكلية الى ما يعرفون شنو يعني سمرة

وغنوها مع الفنان خالد الملا

نراكم بالموضوع المقبل

والمجال مفتوحة للجميع بالتعليقات