:: فصبر جميل والله المستعان ::

بسم الله الرحمن الرحيم

اليوم راح نعرض بعض الإيميلات الى وصلتنا عن ذكرياتكم وأيامكم في الكلية

وقبل ما نعرضها لكم في شغلة مهمة لازم نعرفها عدل

يمكن خلال دراستنا للقوانين والدساتير والنظم القانونية المختلفة

يكون الهدف الأكبر منها انه نعرف العدالة والوصول لنصرة المظلوم ومساعدة المحتاجين

لكن ننصدم أنه حتى الى يدرسونا هالمثاليات يمكن اهما ما يطبقون ابسط معاني العدالة وهذا يعود للطبيعة البشرية نفسها

احنا مانطعن بأحد بس الكل يحاول يوصل للعدالة لكن كل شي بالدنيا نسبي وماكو شي كامل

وفي كثير من الاوقات صج نحس انه احنا انظلمنا والظليمة شينة وتعور القلب خصوصا اذا الانسان ماتعوذ من ابليس ولا حاول يشغل نفسه بذكر الله راح يتولد عنده شعور سيئ يحاول انه يتخلص منه بس ما يعرف

بس خلونا نفكر شوية بالمنطق على قولتهم بالوجك

مثلا الحين انا انظلمت من دكتور وحسيت اني انظلمت

الى اقدر اسوية

اولا اني اروح اكلمة واشرح له اني ظلمني وهذا مو حقي والانسان لازم ما يسكت عن حقة

اهني اما انه يعترف انه غلط او ويصلح الدرجة لانه غلط بالتقدير

او يقولك هذا حقك او هذا نصيبك

طبعا تحاول انك تقنعة وفي ناس تتعمد تظلمك

انت اذا انظلمت تقدر تسوي وايد اشياء

تقدر تفشش تواير سيارته

بس ماراح تتصلح درجتك

وتقدر تهفه طررراق تحمر خده وتفشلة جدام الى يسوا والى مايسوا

بس بالمقابل راح تنفصل من الجامعة وتصير (سلتوح) تفتر بالشوارع لا شغل ولا مشغلة

وتقدر تمشي وتححجي عنة عند الاكو والماكو

وهم ما راح تتصلح درجتك

وتقدر تمارس حقك القانوني وتشتكي عند العميد

بس على الغالب ماراح يتغير شي

وتقدر تذل نفسك وادور واسطات والحالة حالة وتعرض ويهك حق

فلان وفلنتان وبالاخير بيزيدك درجة او درجتين

وتقدر توكل امرك حق الله سبحانه وتعالي

وتقول يارب هالانسان ظلمني وانا ابي حقي منه

وعن تجررررررربه والله العظيم انه حقك يرد لك بالدنيا والآخرة ان شاء الله

شد حيلك بالفاينل والله بيوفقك لانه دعوة المظلوم مستجابة

ياما انظلمنا من ناس وايد كان الدعاء هو سبيل النجاة

والرسول عليه الصلاة والسلام يقول

مايرد القضاء الا الدعاء

والامام الشافعي رحمة الله عليه له بيت شعر عجيب يقول فيه
أتهزأ بالدعاء وتزدريه *** وما تدري بما صنع الدعاءُ

سهام الليل لا تخطي ولكن *** له أمدٌ وللأمد انقضاء

وصدقني اذا كنت فعلا مظلوم حقك راح يرجعك لانك وكلت الخالق سبحانه وتعالي

ويمكن لو توكل احد البشر او تحاول ترجع حقك بنفسك ما راح يرجع لك مثل ما الله سبحانه وتعالى راح يرجعه لك

وفوقة بتاخذ أجر يعني يا سبحان الله انت ربحان ربحان

وبالك راح يكون مرتاح

فهي دعوة للجميع بالتوكل على الله سبحانه وتعالى التوكل الصحيح

والتأكد انه الظالم له يوم مهما طال الزمن او قصر

وياما انظلمنا من ناس وايد او توكلنا على الله سبحانه وتعالى وماهي الا فترة قصيرة واذا بهم يسقطون امام اعيننا فيكونوا بالدرك الأسفل من البشر بعد ان كانوا في اعين الناس في القمة

فهي صفقة رابحة بإذن الله وتذكر الله سبحانه وتعالى بالرخاء يذكرك بالشدة

فكر في الخيارات التي امامك وتأكد ان هناك صفقة رابحة بإنتظارك

انا استغرب بصراحة من ناس وايد

يقلبون الدنيا وما يقعدونها وبجي والحالة حالة

ويفكرون وينهمون وينغثون ويغثون روحهم والى حوالينهم

وصراخ ولوعة جبد على شنو عاد !!!!

انا اقول هونوها وتهون ان شاء الله وفكروا بكلامي عدل والله العظيم الظلم ظلمات يوم القيامة وكل ظالم وله يوم

ليش نستعيل عليه خلونا نعيش حياتنا طبيعي ولا نتكدر وننطر اللحظة الى حقنا راح يرجع لنا فيها من الله سبحانه وتعالى

واذا انا غلطان او كلامي فيه شي قولوا لي !!

----

بالنسبة للذكريات الى وصلتنا هذا اول ايميل

وصلتنا هالصورة ومعاها رسالة تقول انه هالبرنامج الى صار السنة الى طافت من احلى البرامج الى ماراح تتكررر

بصراحة كان اسبوع حلو وكيكة أحلى وان شاء الله شهادتنا بس مايكون فيها كيكة = )

----

ووصلتنا هالرسالة من طالب سنة أولى والى بصراحة الله يعينه على مصيبته

ويقول برسالته على لسانه

انا طالب سنة اولى الصراحة انا عشت تجربة ماعاشها اي طالب في الكويت يمكن حتى بالعالم؟؟؟طبعا الكل يعرف يعني شنو اول يوم جامعة يعني تقعد من النوم الصبح مستانس حدك لانه اول يووم جامعي لك بالكلية وترووح الكلية وانت بكامل نشاطك وتروح للكلية تبي تتعرف على الشباب وتتشرف بمعرفتهم وتبي تعرف شلوون نظام التدريس وتبي..... وتبي.... وتبي.... ولكن.... انا صارلي عكس كل شيانا قمت من النوووم وجسمي احس انه غترة مو مكوووينها مكسر تكسر مع العلم كان اول يوم لي دوام كان برمضان وقمت عطشان المهم اني اول اول ماقمت حسيت بلووعة فطرت للحمام ورجعتورديت وعيوني تقوول سيارة مطافي حمر حيييييييييل المهم لبست ملابسي فردت لي نفس الووعة ورجعت مرة ثانية المهم وانا طول الطريق احس هم بلووعة واول مادخلت المصافط على طوول بطلت الباب وهم رجعت ادري انكم بتقولون حدها قووية بس والله السالفة صج وادري بتقوولوون الله يهداه هذا شمتسحر بس والله انا نفسكم قاعد ارجع وانا مستغرب المهم وقبل لادش اول محاضرة لي بالكلية هم رحت ورجعت فقلت ابو الجامعة ابو ابوها وين ايام المققرات فققرت اني اسحب على كل المحاضرات ورديت البيت ونمت يعني اول يووم لي دوام انا ساحب على الدوام سيفوون بس والله شيسوي الزمن حدني وانا ماستمتعت يهذا اليوم الي كان عند البعض الاجمل بحياااته

اخوي الله يسامحك على ذكرياتك الى يبلها علبتين كلينكس بصراحة المفروض اداوم بسدرية صج صج صج شكلك محسود لاسمح الله او وقتها كنت متسحر شي أثر عليك وان شاء الله تكون بقية ايامك بالحقوق حلوة وكلها نجاح وسعادة ومافيها كل هالبلاوي الله يحفظك من الشر ومن المرض واشوه اني ما اسفط بمواقف الطلبة عشان ما اشوف لوحاتك الفنية الى مخليها حق الطلبة الله يسامحك بس : - ( كان ودي ما انشر الرسالة بس موبيدي هذي ذكرياتكم لحد يلومني )
---

وصلنا اهداء فيه تصميم للبلوق

وهذا التصميم الثاني

شكرا على التصميم الحلو وياريت الى يشارك بمنتديات يحط هالتصميم علشان تزيد المشاركة بالمدونة
--
في دكاترة يحبون يذلون الطالب والعياذ بالله
يعني قبل جم يوم دكتور حط اعمال السنة
راحله واحد من الطلبة وقاله اتمنى تزيديني وشرح له اسبابه

وقاله دكتور انت وعدتني وانت وانت وتقوله دكتور من اول السنة قلتي لي او وعدتني وبالاخير عقب حنه ورنه زاده شوية مو وايد
عقب جم يوم الدكتور شاف هالطالب جان يقوله تصدق ياريتني زتدك اكثر لاني زدتك شويه
يعني خير نعم شسالفة !!!!

يعني جنك قايلة لو حنيت علي اكثر جان زدتك او لو ذليت روحك اكثر يمكن كنت زدتك بس انت ما ييتني وانا مازدتك والقهر لما يقولك ترا انا زايدك من عندي يعني يظلمك ويقولك ترا انا الى متفضل عليك ولا انت اصلا من الاول ماتستاهل
الله يسامحهم و يعجبني الى يعز نفسه وما ينزل من قدره وايد جدام الكل ومثل ما قال الموسيقار محمد عبدالوهاب (( لأ مش انا الى ابكي ))

سمعوها وقيسوها على حالكم مع الدكاترة http://www.6rbtop.com/library/resources/Mo7ammad_3abdulwahab/Collection/listen/21070_hi.ram

وغنتها الست ماجدة الرومي

تسمعها وانت تذكر وتقول حسافة اني ماخذ عندك يادكتور ولا افكر اني اخذ عندك مره ثانية وانا الى غلطان اصلا والشرهه علي اني صدقتك انك راح تساعدني, المشكلة لما طول السنة الدكتور يمدح فيك او يوصلك السما بس بنهاية السنة ينعفس وجنه ما يعرفك ويقولك انت كنت تغيب وانت ماتشارك وانت وانت وانت توقف جدامه مبلم حدك وتقول بقلبك وين حجي اول السنة والتمدح طلعت بس حجي واخرتها تقلها علي طبعا وقتها شتسوي انت بس خلوها على الله ياجماعه مثل ماقلت لكم وابشروا بالخير ان شاء الله

واستماع موفق

http://www.6rbwow.com/media/listen/6rbwow_6819.ram
---

اخيرا يا ناس بنتخرج ادعوا لنا = )

المجال مفتوح للجميع للتعليق والمشاركة ونستقبل ذكرياتكم على الايميل
q8law2004@hotmail.com